晴 9月27日 星期四  

勁眼瞓呀,一返到公司就勁想瞓覺,咩精神都提唔起,對超級熊貓火眼簡直出賣晒我,係人見到我都知道我係熊貓寶寶,不過我都唔想咁,之但係我實在愛莫能助,唔夠瞓就梗係會有熊貓火眼,其實尋晚我已經十點半就瞓覺覺豬,不過好似幫助唔大,睇嚟今晚都要早些少瞓先得喇! 話時話其實我心理上,仲依然覺得自己仲放緊假咁樣,而生理上就冇得選擇,工就一定一定要返,工就一定一定要繼續,絕對冇任何選擇,除非要我豪比公司啦,唔返一日工囉......不過我又過唔到自己個關,唔撈一日真係唔見好多(唔怕講)~

後記: 要去想、要去相信、要去做。很認真地想，努力地想，想像最美好的事，然後相信自己一定會做到，然後找方法去實踐。

好猛太陽 9月26日 星期三  

先祝我個細妹926生日快樂,佢一定係玩得好開心啦,直頭好似唔見左人咁,想講句生日快樂都唔得,不過我已經留言比佢,希望佢有收到就好喇,雖然今年冇禮物送比佢,但心意就一定係唔少得嘅!

中秋節話都冇咁快就玩完,感覺太快喇,或者只係尋晚玩通頂,所以感覺上過得勁快,尋晚好好彩可以幾個屯門之友一齊玩,又可以一齊飲酒,今個中秋雖然過得快,但係就過得好有意思,總之玩得好開心啦~

後記: 事業可以由自己規劃、掌控，但生命給你的習題作業卻無時間表。

天朗氣清 9月25日 星期二  

今晚公司冇得放早,其實已經一早預左,因為聽d同事講過話,上一年中秋節都冇得早收工,所以都唔多抱太大嘅希望,一如以往做到六點就即刻收工走人,不過我就選擇留多半個鐘頭睇定d先,如果唔係呢,同一時間太多人走就會大塞車,我嘅決定係正確嘅,等到人潮散晒之後,一個人輕輕鬆鬆咁回家去,不過出到去德福商場就唔同晒喇,人勁多,唔知點解咁多人去九龍灣&黃大仙一帶,搞到大塞車,好在我返屯門係相反方向,冇事回家去! 天公最終都係做美,向天一望一大個圓圓月亮在天掛,今年嘅月光真美呀~

後記: 作品是否經得起時間考驗，內容本身固然重要，但在這個時代，大家選擇多了，價值觀變得多元，在媒體刺激下變得重口味，變化快。

大雨 9月24日 星期一  

咁難得九月尾打風,點知又食炸糊,冇假放已經不在話下,而家嘅天氣仲差成咁,一係就唔好嚟啦,搞到臨到中秋先至嚟,個天今晚烏雲密佈,連個又圓又大嘅月光都睇唔到,初十四應該都差唔多係月圓時份,真掃興呀......如果聽日十五都仲係咁就'P'佢個'K'喇,中秋缺月好似唔多利是咁,話到明中秋節係人月兩團圓嘛,點能夠只有人而無月呢~

後記: 一定要相信自己找到真愛，人要學習「微軟精神」，如果你確定這條路是你要的，就給自己時間、階段。

T1 9月23日 星期日  

跳過左三日嘅日記,終於都玩完回歸喇!

星期四本來約左個女仔去尖沙咀食飯,我係好辛苦先約到佢出嚟,可惜佢事先又唔同我講話要去睇戲,到我加完班八點幾,之後就飛身出去尖沙咀,到我到左就話仲睇緊戲,咁我唯有等等條女啦,等左半個鐘頭之後都係算把啦,帶住一種被耍嘅心情獨自回家去,戇膠膠嘅一晚咁樣就過去喇......

星期五又係開波日,之前一早已經book定好球場,預左夜晚一定會好夜先返得到屋企,同上次一樣,準時收工,一大班同事拉大隊鬆人,同樣好準時咁六點鐘就正式開波,踢完波十幾人當然係一齊去食餐晚飯啦,開開心心嘅一晚咁樣就過去喇......

星期六終於都被蒲友拉上大陸happy,不過出發之前當然要等收工先啦,話晒都仲有半日工要挨,四點零鐘等齊人就出發,輕輕鬆鬆嘅一晚咁樣就過去喇~

後記: 企業跟愛情很像，今天沒有一個企業會因為你離開而垮掉，即使你了不起當到總裁也一樣。愛情也是，你不要想對方沒有你會怎樣，如果對方真會怎樣，是對方的問題；不然就是你倆在經營這段感情時太過封閉。

晴天 9月19日 星期三  

終於都要開動麗音喇......呢一位外籍同事雖然並唔係美國人或者係歐洲人,似係東南亞或者馬來西亞之類,睇佢黑黑實實咁,原來都幾搞笑吓,可惜佢定居香港又唔去學廣東話,所以佢平時佢都極少出聲講嘢,唯有等到傾工作嘅事先會開口! 今日輪到我喇,今日都算係我咁多年以嚟,講最多最多英文嘅一日,一年前响舊公司跟美國工程嘅時候,都冇講過咁多英文,不過真係唔多習慣講,又聽唔慣日常口語化嘅超快速度英文,有時阿Nel(外籍同事英文名)講得太快的話,我又要用唔咸唔淡嘅英文問多次,搞到好似大家溝通唔到咁,嚟緊呢幾日我都要同阿Nel夾圖,唯有唔怕醜問多幾次,直到明白為止啦~

後記: 情人常以分手要脅對方，如果不懂談判，最後就是殺人、被殺或自殺。

大好的晴 9月18日 星期二  

香港一直推行英語教育,其實都只係前朝文化嘅影響,英文係國際語言,呢一點全世界早已經認同,只要識講識聽識寫英文的話,响香港一定搵到兩餐,想當年識英文簡直係天之驕子,再加上一口流利嘅英語,咁就天下無敵喇! 到今時今日英語都依然係咁重要,其次就係普通話即係國語,到目前嚟講英文同國語我都仲未學得好,返大陸唔識講國語都仲未話好唔掂,起碼識少少都可以溝通得到......不過唔識英文真係完全唔掂,今日阿雞叫我幫公司一位外籍同事改圖,呢位外籍同事係完全唔識廣東話,只講英文,我好辛苦先至聽得明佢講咩,因為學校只教基本英語,日常生活係完全唔一樣,係講得勁快,聽日仲要同佢好好咁溝通溝通,希望佢唔好介意就好喇~

後記: 現代人婚姻出問題，都在價值觀不同、理念不合、不觀察對方、又不溝通。

無風晴 9月17日 星期一  

今日非常之咁平靜地渡過,一如以往返工等放工,唯有講多一套本人認為出色嘅電影,好難得有一套港產片令我讚賞,呢套戲我早响幾個月之前錯過左,後嚟聽返班朋友講值得一睇,咁我都順下民意睇睇啦! 由謝霆鋒+余文樂+房祖名主演嘅《男兒本色》,其實之前都好想去會一會,不過我嘅內心始終對於港產片存有不好感,所以最後都冇去戲院欣賞,唯有睇DVD啦......睇完之後真係好正呀,真係值得推介,估唔到由陳木勝監製嘅港產片係咁出色,2007年難得一見嘅佳作,故事雖然係老土到極,但係表達手法出嚟嘅效果就唔錯~

後記: 我們應先了解自己想做哪類工作，再看哪些行業這幾年需要什麼人才。

煙霧迷漫 9月16日 星期日  

本來星期六收工之後應該可以輕鬆一下,久違嘅蒲友又再一次召喚我,應該係我先召喚佢在先,實在係太過興奮喇,點知臨到出發前一晚十二點嘅時候,肥仔竟然話有事在身唔去得,原因係話佢老闆嫁女喎......唔成團當然係出發唔成啦,咁唯有約屯門之友去睇戲,李連杰正正有套新戲上畫,叫做『搏擊戰』,心諗李連杰拍武打片必定掂啦,仲要加埋一個咁猛嘅中文名,點都要去會一會套戲......睇完之後感覺係差囉,我睇戲好主觀,好睇就係好睇,屎片就一定係屎片,真係套片好爛囉......完全同個死人中文名一D關係都冇,更加離譜嘅係開槍多過用拳頭,失望~

後記: 要得到理想愛情，和找工作一樣。每個人都窮其畢生之力發現自己、喜歡自己；發現不喜歡的部分就去改善。

天晴 9月14日 星期五 

我公司design department嘅頭目"阿雞"經理係個頭號嘅麻煩分子,今日又出奇地發揮麻煩分子嘅本色,原本單嘢係唔關我事,不過都係講緊我跟嘅project,有位計數嘅同事"阿熙"孖住我跟黃竹坑道酒店工程,而我就負責設計&畫圖,之前都已經搞左一大輪功夫,成三個幾禮拜都仲未可以做到submission,所以阿雞開始唔多耐煩喇! 今朝阿雞就捉住阿熙&我講返設計&計數上嘅問題,氣氛一早已經非常之嚴肅,通常答唔到阿雞嘅提問,佢就會串人,因為佢知道自己比其他人醒,到最後搞到大家不歡而散,真係好鬼無謂......其實每一個人做事嘅手法都唔同,總會有人叻d有人屎d,但係咁唔代表屎嘅人唔掂,大家都係成年人,應該比返多少尊重大家,鬼叫阿雞係我地阿頭,一定會非常之咁尊重佢,但係話晒大家都係同事一場,比返些少面子日後咪好相見囉~

後記: 浪漫有兩種：一種是純粹想像，但揭穿後會很醜陋；而真正的浪漫，是連醜陋的部分也接受。